శర్మ కాలక్షేపంకబుర్లు-రజ్జు,సర్ప భ్రాంతి న్యాయం

రజ్జువు అంటే తాడు సర్పం అంటే పాము. తెనుగులో ‘తాడుని పామనుకోడ’మనమాట.

తెల్లవారుగట్ల నాలుగుకు లేవడం అలవాటు, అలాగే పెరటి గేట్ కు రాత్రి తాళం వేయడం, ఉదయం లేచిన వెంఠనే తాళం తీయడం అలవాటు. ఒక రోజు తాళం తీసివస్తుంటే కాలికింద ఏదో పడింది, మెత్తగా ఉంది, నొక్కు కున్నట్టూ అనిపించింది, పామేమో అనుకుని కాలు గబుక్కున తీసి ఒక్క దూకులో లోపలికి చేరి, లైట్ వేసి రెండు కర్రలు పుచ్చుకు బయటికి వెళితే, అక్కడ కనపడింది, నిన్న సాయంత్రం మొక్కలకి నీళ్ళు పోసి వదిలేసిన రబ్బర్ గొట్టం. అరె! నీళ్ళ గొట్టాన్ని పామనుకుని ఎంత భయపడ్డాను, అనుకుని సిగ్గు పడ్డాను.దీనినే రజ్జు,సర్ప భ్రాంతి అన్నారు.
అక్కడ నిజంగా పాముందా?
లేదు. కాని పాముందని భ్రాంతి మాత్రం కలిగింది.
ఎందుచేత?
అది తాడని తెలియకపోడం చేత.
ఎందుకు తెలియలేదు తాడని?
చీకటిలో కనపడకపోడం మూలంగా.
అంటే అజ్ఞానమా?
తెలియని తనం అజ్ఞానమేగా.
కలిగిన అనుభవమేంటి?
భయం.
అంటే తెలియని తనం అజ్ఞానంతో కలిగేది భయమైతే జ్ఞానం వల్ల కలిగినదేంటి?
అది తాడని తెలిసిన తరవాత కలిగినది నిర్భయం.
చీకటి అంటే అజ్ఞానమూ, వెలుగు అంటే జ్ఞానమూ అంటావా?
అవును కదా! అది తాడని తెలియనపుడు కలిగినది భయం, పాము కాదని తెలిసినపుడు కలిగినది నిర్భయం.
రెండూ మానసిక స్థితులేనా?
అవును.
అంటే నీవు ఏమానసిక స్థితిలో ఉంటే అదే నీకు కనపడిందా, ఆ వస్తువులో? అవునా?
అవును.
కాని అక్కడి వస్తువులో మార్పు వచ్చిందా?
లేదు.
అంటే వస్తువులో మార్పులేదు కాని నీమనసులో మార్పువచ్చి, అజ్ఞానంతో పామని, విజ్ఞానంతో తాడని తెలుసుకోగలిగావు కదా?
అవును.
అంటే జీవితం లో కావలసినదేమిటీ?
విజ్ఞానం.
అంటే వెలుగు అనే విద్య, వెలుగులేనపుడు పాముగానూ, వెలుగులో అదితాడుగానూ కనపడింది కదా! నిజం తెలిస్తే భయం పోయింది కదా. అందుచేత కావలసినది నిజం తెలియడం అనే విజ్ఞానం, అదే విద్య.
అమ్మయ్య! విద్యతోనే విజ్ఞానం వస్తుందా?
రాదు.
మరేం కావాలి.
విద్యతో కావలసినది వివేకం. విచక్షణా జ్ఞానం, అది కలిగినపుడు మాత్రం ఆనందం కలుగుతుంది.
ఆనందం అంటే?
అమ్మో! పెద్ద ప్రశ్న మరోసారి చూద్దాం.