శర్మ కాలక్షేపంకబుర్లు- పుట్టని బిడ్డకి పేరుపెట్టడం

అజాతపుత్ర నామోత్కీర్తన న్యాయం
అజాతం అంటే పుట్టనిది, నామోత్కీర్తన పేరుపెట్టడం. ఒక్క ముక్కలో చెప్పాలంటే పుట్టని బిడ్డకి పేరు పెట్టడం. ఒక కొత్తగా పెళ్ళయిన జంట. భార్య గర్భవతి ఏమో అని, అనుమానం, నికరం కాదు. ఏ బిడ్డ పుడుతుంది? చర్చ ప్రారంభమయింది, ఇద్దరి మధ్య. మగపిల్లవాడని భర్త, కాదు ఆడపిల్లని భార్య, కొద్దిసేపు కీచులాడుకుని పేరేం పెడదామంటే, మా నాన్న పేరని భర్త, కాదు మా నాన్నపేరని భార్య, ఆడపిల్లయితే మా అమ్మ పేరని, కాదు మా అమ్మపేరని భార్య కీచులాడుకుని పొద్దుపోయేకా నిద్దరోయారట. తెల్లారి భర్త లేచేటప్పటికి భార్య పక్కన కనపడలేదు, బయట కొచ్చి చూస్తే ఆవిడ చాప, చెంబు పుచ్చుకు కూచుందిట 🙂 ……ఇదీ పుట్టని బిడ్డకి పేరు పెట్టడం తగువు. దీనినే ఆలు లేదు చూలూ లేదు కొడుకుపేరు సోమలింగం అంటాం.కొనగల గేది పెట్టగల బచ్చలిపాదు తినేసినట్టు.

అంధగజ న్యాయం
గుడ్డివాళ్ళు ఏనుగు గురించి విచారించడం. నలుగురు పుట్టు గుడ్డివారు, ఏనుగు ఎలా ఉంటుంది అని చర్చ ప్రారంభించారు, ఎంతకీ ఏనుగు ఎలా ఉంటుందో ఒకరూ చెప్పలేకపోయారు, ఇంతలో అది వింటున్న మీలాటి బుద్ధిమంతుడు, వారిని ఏనుగు దగ్గరకు తీసుకుపోయి వదిలేసి, మీరిప్పుడు ఏనుగు దగ్గర ఉన్నారు, చూడండి అన్నాడట. చూపులేనివారు ఏo చూడగలరు? ఏనుగును తడమటం మొదలుపెట్టి, మొత్తానికి నలుగురూ ఏనుగును చూశామని సంతృప్తి చెందారట. ఇప్పుడు మళ్ళీ చర్చ మొదలయ్యింది, ఒకడు ఏనుగు స్థంభం లాగా గుండ్రంగా ఉందన్నాడు, మరొకడు సన్నగా పొడుగ్గా కదులుతూ ఉందన్నాడు, మరొకడు భూమి కి ఎత్తుగా చిన్న తోకలా ఉందన్నాడు మరొకడు, ఇలా, ఎవరికి తోచినది వారు చెప్పేరు తప్పించి అసలు ఏనుగు ఎలా ఉంటుందో ఒక్కరికి తెలియలేదు, చెప్పలేకపోయారు. దీనిని బట్టి తెలిసేది, చూపు లేక వారెలా ఏనుగును చూడలేకపోయారో మిధ్యా చదువులు, విజ్ఞానం ఉన్నవారు విషయం యొక్క అసలు రూపాన్ని, సత్యాన్ని తెలుసుకోలేరని, మిధ్యావాదమే చేస్తారని దీని పిండిత, పండితార్ధం.

అభావవిరక్తి న్యాయం
అభావం అంటే భావం లేకపోవడం, విరక్తి అంటే కోరిక లేకపోవడం. నిజానికి దీనిని అందని ద్రాక్ష పుల్లన అని తెనుగులో చెప్పుకోవచ్చు. అబ్బ! చీరెంత బాగుందో! భావం, ఎంతయ్యా ఖరీదు? తక్కువేనండి ఐదువేలు. అబ్బ ఇంత బరువుగా ఉంది, ఐదు వేలెట్టి కొనుక్కుని ఇంత బరువెలా మోస్తాం బాబూ! విరక్తి. అసలు సంగతి ఐదు వేలెట్టి ఆ చీర కొనే స్థోమతు ఆమెకు లేదు, అందుకే విరక్తి. ఆ చీరే కనక రెండు వేలంటే ఆవిడ ఎగిరి గంతేసి కొనేసేది. ఇది మనసు చేసే చిత్రం, అందని ద్రాక్ష పుల్లన కదా.! అదే ఇది.ద్రాక్ష పళ్ళకోసం ఎగిరిన నక్క అవి అందకపోయే సరికి పుల్లగా ఉంటాయని విరక్తి పెంచుకున్నట్టు.

కులాలచక్రన్యాయం
కులాలుడు అంటే కుమ్మరి. చక్రం అంటే తెలిసినదే కదా! బండి చక్రం కుండలో ఇరుసు ఇండగా బూమిపై నిలబడుతుంది. దొర్లిస్తే కొంత దూరం ప్రయాణమూ చేస్తుంది. మరి కుమ్మరి చక్రం చూశారా! కుండలో ఇరుసు భూమిలో పాతి ఉంటుంది, తిప్పితే ఇప్పుడూ ఈ చక్రమూ తిరుగుతుంది, కాని ఎక్కడికీ ప్రయాణం చేయదు, అక్కడే తిరుగుతూ ఉంటుంది. దీనినే గానుగెద్దు జీవితం అంటాం. చేసిన పనే చేస్తూ తిరిగినచోటే తిరుగుతూ తిన్నవే మళ్ళీ మళ్ళీ మళ్ళీ తింటూ మళ్ళీ మళ్ళీ పుడుతూ ఛస్తూ ఉంటాం. అదనమాట కులాల చక్ర న్యాయం.

మరిన్ని మరోసారి….